山路

不如從新開始

2009-10-17T00:34:00.005+08:00

下星期, 是一個新的開始了,
希望一切順利,
希望快些無債一身輕,
希望能早點清還朋友債,
希望能平淡安穩渡過餘生,
更希望....所有心血少的經歷遠離我,
我這十多年的遭遇已受夠了....
人又開始老, 錢又一早無,
我會珍惜這個新開始的機會,
四年後, 一條好漢.

好的開始

2009-08-24T22:14:00.002+08:00

好開心呀, 今日多接一盤數做,
好野....多 D 來, 密 D 手,
各位老細, 老闆,
想做數, 揾我啦~
開心, 開心, 好開心^^

努力揾工

2009-08-23T21:50:00.002+08:00

回歸正常, 返番自己嘅世界之後,
要開始努力揾工了,
聽日試o下同銀行傾,
可唔可以將 D 咭數轉P-loan,
每月定期定額還款,
希望可於五至六年還清,
亦希望能夠快快揾到份高人工的part-time,
同埋多 d 人揾我做數,
接多幾盤數做, 多 d 來密 d 手,
賺多多多, 還快快快~

兜個round, 開心o下啦

2009-08-22T23:50:00.002+08:00

摺埋左間舖, 用了緊餘的一皮野,
去了西藏一趟, 真是好任性的我啊!
係呀....要吸一口大大大大的氣ma,
鬱左兩年幾, 係時候要出去任性地釋放自己了,
在這15年來, 太多唔開心嘅野,
有時, 真唔明 d 有錢人,
物質滿足, 但心靈又唔滿足,
如果我有錢,我想我會可能滿足,
我要求唔高,只是想快快快快還完 d 債,
有錢交租, 有錢食豪 d(例如:去小肥牛食 7 舊水一餐),
有10-20萬o向戶口慢慢洗, 平淡的生活,
然後, 有錢再去流浪, 就是這樣簡單的妄想吧!!!

懵....炳

2009-07-30T22:54:00.004+08:00

'人地話你唔知, 嬲你又唔知,
你都係嬉嬉哈哈咁對人',
以上係亞媽O向我好細個時同我講嘅話,
事實上又係嘅, 到家O下大個左同老左,
先知世事起能如你,我,他願呢?
可能一些自己認為可舒緩情緒心底話嘅公眾地方,
睇嘅人,有心與'真有心'已經是兩種心態,
屋漏兼蓬夜雨,一沉萬踩,
各式各樣的咀臉,聲線,態度,
大概都心中有數,
有時,忠於自己比忠於人家難,
人永遠都係想人人都對自己好,
我行我素, 通常都必定o賴野,
因為少人認同你係獨特,
多人認為你係固執極端嘛~

醒o下啦~ 懵,夢,矇....

愛與痛的邊緣

2009-06-29T23:46:00.003+08:00

有些事真是很難解釋,
自從決定關門大吉之後,
這個半星期以來已經第七日食蛋,
開張以來都未試過,
真係好邪....唔知係咪間舖唔捨得我呢?

如果唔係賺埋都唔夠比 min pay,
我亦唔想忍痛...
其實每月有些人工, 還有一點薄利,
只可惜欠銀行的咭數,
不可每月只比成九千銀min pay,
入不敷支,永遠還唔到本金,
每時每刻都好驚連min pay 都比唔起,
會有收數佬上門,
好辛苦及太大壓力,
這樣下去真不是辦法,
還有欠朋友的錢呢?
所以我決定要債務重組,
希望可以o向這幾年還晒錢比銀行,
我唔想破產,
因覺得對所有債主都好唔公平,
欠債就要還錢.

雖然我是一個任何事都失敗的人,
但唔想做一個因財失義的人.

.......

2009-06-06T00:27:00.003+08:00

六四、梁洛施、石堅.
同日發生, 同步目瞪口呆!!!
人生?
死...生...死....

香港有前途

2009-03-29T01:02:00.003+08:00

當全世界 D o靚仔追奉PSP, XBOX360, Wii,
iphone,ipod touch, NDS.....out爆之時,
我國有一小如鼻屎之地,
土產出一眾小陀地已埋頭研制大型炮仗,
臥身嘗爆, 爆佢地唔死,
但將之其老母已嚇至口有白沬起泡,
顯現出其有智慧之中,深藏大量愚頓isum,
他們妄想可以為改變世界,
諗住懷着要為香港再轉型以生命作出的一種名為,
你死你事的驚嚇矛盾產品'炸唔死炸彈'的偉大理想,
不可一...次炸你唔死...就不可再唔試喎!!
若果,可能, 或者成功的話,
定必為這鼻屎之地創造大量就業機會
香港...不可靠炒樓, 不可再靠炒股,
不可再在街上成隻跟尾狗咁追住不停閃避的街坊問:
'先生,上台好底架, 送你100 蚊月費兼無限打....小人呀!!
所以...你班死o靚仔, 香港前途靠晒你地喇!!

兇磅

2009-02-20T00:12:00.002+08:00

新年過後, 踏上人生最難頂的一刻,
一上....個磅壞ger~....
再上....個磅....冇奶油格???
又再上....肯定地....係肥左 7 磅!!
7 磅, 7 磅....7 磅呀!!!
短短一個安穩年假的代價,
一定係蘿蔔糕, 花生, 薯片, 杯麵...原兇就係金莎,
點算? 家o下年紀大, 新陳代謝又慢,
點減??
最衰就係上磅架勒,
唔上咪嘜都唔知law~

今年過年特別灰

2009-01-31T23:48:00.010+08:00

以前每年新歲我都會出外渡歲,
但這兩年因搞生意的關係,
並且時不我予也,
生意又不景氣, 導致債務纏身,
金融海嘯之後, 更難捱下去,
今年連給家人過年的錢也是借回來的,(他們不知)
本想過年後, 關門大吉,
再找多幾份下午的Part-time,
加上上午於舊公司的那份優差,
應該勉強可以的,只要肯做就得啦...
可惜,以前的工作不能回頭了,
老闆前陣子說,過年之後,因美國的不景氣,
工作少了,所以不用天天回公司,
我聽了之後....晴天霹靂,
因為我是以時鐘計的,
所以這個新年假期, 我是 0 收入,
我的計劃被打亂, 抑鬱了一陣子,
還是要從長計議...
1.店一定要繼續做,
2.要接多幾個班,
3.還要接多幾份account freelance,
可以拿回店做, 間中要上人家的公司做,
4.再把一些時裝放上網, 希望多樣化來揾多些錢,
好辛苦...真係好辛苦...
資不抵債....
我不喜歡欠人家任何東西,
由其是開口向人家借錢時,
若不是迫不得矣,也盡量不問,
因為我覺得世上最冇尊嚴嘅...就是問人借錢,
人家幫我是人情, 不幫是道理,
在此感謝所有幫過我的好朋友,
以前我很少買六合彩,現在多買了,
正財沒有我份兒之時, 還望橫財就手啦!!

葉問

2008-12-21T00:59:00.002+08:00

今晚看了一齣好戲 ── 葉問,
「詠春拳始創於嚴詠春師祖，
而嚴詠春學藝於少林之五枚大師，
故詠春派是源於少林。嚴詠春嫁給梁博儔後，
隨夫歸原籍廣東肇慶，詠春功夫，
輾轉經梁博儔傳給梁贊，這裡，也有各種傳説。
一是梁博儔傳給梁蘭桂，黃寳華，梁二娣……等人，
再由黃，梁（二娣）二人傳給梁贊，
梁贊傳給陳華順，陳華順再傳給葉問.」
(武舘嵗月─詠春的起源,作者：楊七郎)

甄子丹演葉問, 導演選對了,
一個真功夫的好演員,非他莫屬,
我是由他的《黃飛鴻之二：男兒當自強》,
他演'納蘭元述'用布棍與李連杰對打的那一場,
被他吸引了, 好型!!
今次他也是, 演繹出詠春拳的那種剛中帶柔,
柔中帶剛的真功夫及葉師傅的平和,正!!

原本是找梁電眼....好在,
真難想像梁電眼演葉問師傅,
肯定成部電影由頭到尾都是剪接而成,
眨到頭都暈,一個對功夫, 一竅不通,
姐手姐腳,那能有資格演一代宗師?

撩男仔

2008-11-05T00:58:00.003+08:00

今晚, 好榮幸, 能夠在回家車程中,
坐於兩個俊男之中, 荀呀!!
但......
這...兩個不相識的俊男,
居然同時一齊不停咁...
撩鼻屎
短短 10 分鐘車程,
撩極撩唔停,
Ur...好嘔心!!

非粗口可形容

2008-10-15T23:24:00.009+08:00

今日聽到份屍證報告, 真係火都尼,
居然向老人家開刀,
咩叫生果金呀?
係比老人家買野食架咋,
審嘜撚野查呀? 審..審..審..審O下果班屎忽腦高官,
點解用個屎忽諗野, 用隻屎眼睇野仲實際啦!!
無左lee班老人家? 唔係上一代?
97前嘅香港有咁繁榮?
你班仆街有今日咁撚風涼?
寧願將 d 錢比果 d 大食懶,
扮好撚可憐嘅十八嬌妻八十郎綜援怪演員,
講真...真係好想打實 lee 班騎呢配,
明明係私人交易,
叫佢地做野就話無力, 但扑野就大把力,
生埋一竇竇做得佢曾孫嘅人仔,
點解要我地納稅人養 lee 班只識扑野嘅老柴一家呀?

我老豆老母O向香港捱左幾十年,
藍領出身, 真真正正有份建設香港,
交左唔少稅,得到 D 咩呀?
本來我對突手冇嘜意見,
但 lee 鑊真係氣難下,
今日有議員掟蕉, 真係比足面佢啦,
如果係我~ 攞煲熱水淋佢仆街啦!!
老人家都唔尊重,
睇住比雷劈囉!最好着定對灰膠鞋呀...核能人曾...

非男非女

2008-10-10T23:28:00.003+08:00

有時, 我在想...其實我雖是女人身, 但卻是男人心,
我的喜好都是男人所愛好的,
從小到大,不愛打扮,
頭唔梳, 牙唔擦,
人字拖,通山跑,
亞媽不停比裙我着, 扮到我靚靚咁,
但我就着住條靚裙去爬山,
勾爛之後, 回家便得到貓錬塔手腕的卓越對待,
冇飯食之餘...家人還在我面前,
作出那種享受食物美味的表情,
到家o下都沒忘記, 這是否童年陰影呢?

又例如 :
由細到現在都迷 HI-FI,(唔食都要有Hi-Fi)
超極鍾意鍊車同飊車,
十五歲就揸大膽車上大霧山頂,
連整水喉, 駁電線, 楂電鑚,
維修家居, 安裝天線,
車、鑼、鉋、鑚,樣樣知曉,
棟腳、咬牙籤, 開聲就來兩枝大啤,
粗聲粗氣, 粗口爛舌(曾經),
正正是一個....係麻甩佬見到都無鞋挽劇走嘅...街人
但...有一樣野,肯定唔似男人,
就係...好在我只鍾意男人, 好 MAN 嘅 Men,
仲係要髯客咁嘅look,
一但有幸遇上, 定必變身為巨鳥依人.

關門大吉後傳

2008-10-07T22:55:00.006+08:00

如果我的店有一天關門大吉,
我會背起背包去西藏或尼泊爾一轉,
來平衡一O下心理,
回來時, 從新震作,
從新找工作...賺錢還債...,
望各位債主能見諒.

牛一

2008-10-02T23:41:00.002+08:00

今日牛一,
心情極劣,
不想接觸任何人,
家人熱情地邀請晚飯,
也沒心情地惋拒了,
只想孤單一個度過,
等待下一個牛一的來臨,
(如果有的話)
Emm....我的生日願望係....
中六合彩頭獎...三仟萬...
家人朋友個個身體健康...
小小心願, 望...如願以償

亞仔

2008-09-27T23:45:00.006+08:00

最近, 因太忙...
忙病、忙頸痛、忙手痛、忙睇醫生、
忙失眠同埋忙撲水(長貧難變),
所以冇嘜時間寫'扑',
連亞仔'S 都無嘜時間交流,
只係老大雙九年華果日,
一家四口O也過一頓自助餐...
以為盡了老母嘅責任啦!
點知...一山還有一山高,
佢 D 同學比佢嘅十八歲生日驚喜仲犀利,
係拍左條片來賀佢生日,
我睇完之後, 拍案叫絕,
我真係要檢討一O下....唉!!
超人生日快樂

我的生日願望

2008-08-28T00:24:00.004+08:00

就係去...'水立方' 游番轉囉!!
hehe....

佢第一次出現o向我瞳孔時,
我已深深愛上了,
連發夢都見到, 我置身其中...
所以, 我一定要得嘗所願,

水立方...

photo post from :http://farm4.static.flickr.com/3171/2454941950_f6492edf1e.jpg

收留

2008-08-04T00:17:00.002+08:00

過多一個禮拜, 間屋要維修,
家陣要到處搵人收留,
本想去亞妹果暑...
但好似唔係幾好,
因要呀賓姐姐瞓廳,
個心有 d 唔係咁舒服咁,
租酒店又太貴...比唔起囉,
打搞朋友...又好似唔係咁好意思,
真煩...

祈求

2008-07-28T00:31:00.002+08:00

亞朗, 千祈唔好有事....
如果可以的話,
不如由我來代替吧!

夢中人

2008-07-13T23:44:00.003+08:00

由我有意識以來, 每日渴望的就是...睡覺,
因為可以發夢而進入的另一個世界,
由細到大,每一晚都發夢,
而每個夢都好好玩,
夢境都好靚,還比神話中的仙境更美,
我真想一睡不起,而可以長存於那邊的世界裡,
那些從未在現有地球裏出現過的地方及天象,
(包括Discovery channel 所搜羅到的)
實在太美, 好幾次因夢境太深刻,
一起來時, 還把它用線條畫下來,
咫尺翱翔, 七彩海洋,
任意在海上飛揚, 闖入於高山的海岸,
古靈精怪的珍禽異烏, 反力學結構的建築,
猜不透的天象等等...
又到時間返回我的夢世界裏了,
今晚唔知又去邊暑玩呢hehe....
Good night!!

太陽伯伯

2008-07-10T18:13:00.003+08:00

太央迫八, 太央迫八,
你去左邊? 你去左邊?
快 D 番番出離, 快 D 番番出離,
焦着鵝, 焦着你.

無雨問蒼天

2008-07-09T23:34:00.001+08:00

究竟.....幾時先至有陽光呢?

奧運仆瓜

2008-07-04T23:35:00.003+08:00

睇見果五隻妖怪, 真係好恐怖,
完全match up 晒中國傳統妖怪嘅實在條件,
到處可見, 無處不在,
真係想一把火燒 Q 晒佢地,
家O下仲日日下午加埋果套'仆瓜噢...混慢遊記',
##口##ZZX****
想荼毒O靚仔?同佢地洗腦?
真係攞你九命,
無咁大個口, 就咪鬼吸咁大口氣啦~
好心慳番 D 彈藥去賑O下災啦,
人家意大利於1906年因地震及天災,
都即刻停辦,留番 D 錢來賑災,
'倫敦市只用了一年時間去籌備，原因是原本被安排主辦該屆奧運的城市羅馬，在意大利政府於1906年宣佈該國因為飽受多次地震和火山爆發災害後，財困無法籌備奧運，便改由倫敦主辦。'(資料來源:維基百科'1908年夏季奧林匹克運動會')
成日死充大頭鬼,勞民傷財去學人搞咩噢混,
人地以民為本, 大陸就話知你死,
最緊要係打腫塊面扮肥佬,
真係小喇叭,小那媽.

......

2008-05-23T23:45:00.003+08:00

人生短,
淒冷涼,
悲災憫人哭斷腸.

塵歸塵,
土歸土,
地震亡魂歸天路.

返天家,
往浮屠,
老少齊進仙樂都.

唉....

泯滅

2008-05-18T01:09:00.004+08:00

老天爺(包括各國所信奉的假設偶像)用人的血肉之驅來舒了一口氣,
袮的一震, 可知道四川兄弟姊妹和那未開眼看世界的娃娃付出有多大嗎?
受不了的慘不忍睹影像穿梭於我們眼球與腦神經之中,
是考驗?是試煉?是玩笑?
什麼神愛世人? 什麼滿天神佛保佑? 什麼好人有好報?
通通都是在這次玩笑之中, 暴露了袮們(假設是存有)的底牌,
完全明白了為何我們會自私, 我們是遺傳了袮自私的 DNA .
我們可以怎樣? 袮心情不好時, 我們更要陪袮玩命...嘿!!

今天看了一則我覺得非常同意的稿,是區樂民先生在生果日報寫的:

一封妙信讀者寄來一封信，節錄如下。
區醫生：
我知道你是天主徒，想和你談談宗。
我討厭天主和基督，尤其是後者。瑪利亞十月懷胎才生出耶穌，辛辛苦苦養大他。基督卻不尊敬瑪利亞；連母親都不尊敬的人，居然有資格上天堂，真過份！
神叫人不要吃禁果，但亞當和夏娃偷吃了。偷吃也不是甚麼大事吧！哪個孩子不偷吃東西？神可能曾叫人不要聽魔鬼的話，但神沒有說那條蛇是魔鬼呀！神不說，夏娃怎會知道呢？
不過那個夏娃也算蠢。蛇叫她吃禁果她就吃，也不想想一條蛇怎會忽然懂得說人話。她應該謹慎一點。
一人做事一人當。亞當和夏娃犯錯，就罰他們好了，為何禍及後代呢？父親殺人，兒子填命，是甚麼法律？
基督說不信神的人會下地獄，看來我死後多數要下地獄。不知地獄有沒有上訴機制，讓我和神理論一下。
寫到這，等一等，有隻蚊子闖進來，好像要叮我。牠是不是神的使者，飛來警告我？哎呀！中招了。
小讀者上

看了以後, 有何感想? 或感受?

死肥婆

2008-05-12T00:17:00.003+08:00

看着自己越來越大的蘿友,
看着自己越來越闊的餅面,
看着自己越來越厚的水泡,
看着自己越來越粗的豬蹄,
看着自己越來越漲的肚腩,
近日發生多宗牛仔褲爆鈕事件,
很唏噓...唉...
與美女的距離越走越遠,
為何現在的我....每天,
腦海裡都是美食的影子,
早餐時,已想着午餐吃的,
午餐時,便想好晚餐菜式,
火煱, 自助餐, 大排檔, 大啤...
點算? 一定要下定決心,
回復四年前的我, 起碼減10磅,
實行誅滅蘿腩計劃,
加運動, 減食量,
地獄拉麵式的意志,
嘿! 等着吧!

豬骨煲

2008-05-09T17:28:00.002+08:00

前兩天, 舊客仔過海來探我及幫襯,
之後, 我地兩個去左食大角咀最出名嘅豬骨煲,
這裡最有名的, 有兩間,
骨煲皇及良記正宗澳門豬骨煲,
因是第一次食, 所以都不知那間好味,
一行到街口, 這兩間的員工就分別大聲叫,
又送啤酒, 又送菜, 各出奇謀來搶客,
當我打電話,在找我的住大角咀同事,問那間好之時,
良記那邊員工走過來, 同我地講, 送菜及啤酒兩樣,
所以便去了良記.

我地選擇左一個細嘅 '北菇花膠豬骨煲' HKD100.00
另外再加本地手切肥牛, 珊瑚蚌, 脆鯇片, 金菇,
油麥菜(送)及兩枝大啤(送),
個煲來到, 嚇了一跳, 好大好滿...
滿滿的細花膠, 大大件的豬手骨, 花菇及白蘿蔔,
肥牛好大碟, 好靚, 樣樣都好新鮮,
我地由頭食到落尾, 終於大功告成,
最後, 剩下豬骨湯, 成煲都起晒膠,
好飽,埋單只不過HK$ 320.00 (超底食),
可惜回家途中, 個胃一路頂住, 好辛苦,
可能太肥膩, 回家不久, 便獲膩回吐,
真係嘥料, 下次會再去過, 但會試另一間,
看看那間好味道!!yum.....mmmy!!!!

白髮more 女

2008-04-18T00:46:00.005+08:00

最近可能因常常頭痛及搬舖, 心身疲累的關係,
白頭髮多左好多, 上屋搬下屋, 唔見一蘿殼,
點止一蘿殼, 殼倉就差唔多,
加上本人擁有一把露宿者般的超長超粗及超厚的獸髮,
可能因此導致慣性頭痛,
所以大剪一揮, 全把煩惱絲幹掉,
爽~ 超爽~ 真係好清爽~~
可惜頭髮超短的關係, 所有白髮便無所遁形,
白髮超光速咁露出, 初初都有用個眉鋏去蚊,
但蚊蚊o下就覺得好唔對路,
再咁蚊落去好快變禿鷹,
那就...隨它吧!!

我有無問題

2008-03-25T00:56:00.003+08:00

自從腦神經科說我腦神經緊張,
開了一些精神科藥物給我,
我告訴了朋友之後,
人家就當了我是有神經病問題似的,
真是好好笑...

突然...我想起一部戲...

"我有無問題" (1999)
戲裏講述"一個女孩本性叛逆，
有自己的想法，卻因此被醫生誤診有精神分裂，
被送進一家精神病院中。
在精神醫院中，女孩認識了一群行為舉止獨特的女孩，
她們各有各的才氣，也各有各的問題。
其中最亮眼的放蕩的麗莎.
她和她發展出亦敵亦友的關係。
在護士的另類治療下，這些女孩互相扶持，
重新認識自己，找到了人生的意義。"

我是非常喜歡這齣戲,
當時看的時候已很有共嗚感,
可能當時已經出現問題啦~
係咪有異於常人的想法或有自己的一套就是有問題?
有時覺得很可笑, 什麼是一定? 什麼是規定?
什麼是假?什麼是真?
誰來Jugde? 你? 我? 或那些所謂什麼專家?
那...你唔覺得聽 D 你唔識嘅人嘅話,而又信以為真?
好好笑, 又唔見你地咁聽你亞媽話?
每個人都有自己嘅想法,
很反對同反感一些機械理論式的做法及想法,
好老套,每個人都有自己的獨立想法,
何需要迫自己去認同一些所謂專家,
佢地的所謂從幾多個臨床經驗加上自我思維衍生出的自私想法呢?

其實有問題的可能你地是太聽話了.

一班濕米鈍豬

2008-03-12T00:05:00.005+08:00

如果係我, 一定宣佈全港幼稚園及小學停課,
班食濕米, 火唔燒到眼眉都唔知死,
已經死左三個小朋友了,
若其中一個係果班大蟲嘅金菠law,
睇o下佢地會點 ?
我諗即刻提早放2009年農曆年假啦,
真係小喇叭!!
上一鑊沙士仲唔知死, 大人都死成三佰,
家o下係細路, 抵抗力比大人低,
感染傳播力超強, 後果不堪想像,
唉!真係唔明果班人頭鈍豬,
成日驚咩鑊, 驚 d 意識低嘅家長炳,
仆你個街, d 家長意識低姐,
你地讀咁多書, 意識會高 d 家 ma,
咪手起刀落話比佢地聽,
如果一經感染, 你 d 仔女會死law,
所以要停課, 盡量制止人傳人嘅可能性law,
2003年沙士, 就係因為班仆街後知後覺,
先至犠牲左成三佰條無辜命......唉!!

尋:強力風筒

2008-03-11T00:21:00.002+08:00

自濕頭後, 屢吹不乾,
嘗盡型號, 屢試無效,
髮尾滴水, 長滴長有,
水向外流, 暫不止息,
方法用盡, 仍無乾意,
千金散盡, 塘乾底裂,
風吹散髮, 回頭太難,
常盼烈陽, 可自然乾,
惜守多月, 意志漸沉,
誠意徵求, 強力風筒,
只望髮乾!!

最近我比較煩....

2008-03-08T00:14:00.004+08:00

一句'做咩咁遲先來睇?'
令我整日強忍住眼淚,
面對着醫生, 他要我所做的測試,
才知情況是原來如此,
看着自己不協調的動作, 很驚訝!!
我覺得左手好似廢手一樣,
面部的肌肉完全失控,
面對住醫生,醜態盡露,
完全事與願違, out of control,
這一刻...
只希望我的意志力能繼續堅守!!
遇強越強o麻, 一定能夠又一次走運吧!!

以上只抒發內心的沙石,
請見諒!!

何許大事???

2008-02-20T01:22:00.002+08:00

只是死了一個人, 有何許大的哀?
香港日日有人死, 點解你地又去由朝到晚報導?
太唔公平!!
認識她, 只因她的工作崗位,
每人的工作單位都不同,
偽人是特別嗎?
也是人, 人終需一死
我覺得她沒有什麼大不了.

若果你隔離屋隻貓瓜老襯,
會唔會有冇咁大反應?

遲來的鼠年願望

2008-02-17T23:59:00.003+08:00

新的一年, 新的希望.
我希望橫財就手,
中六合彩一百萬,
甚麼問題也能解決了!!

心想事成!
萬事勝意!

高速健康

2007-12-30T21:44:00.000+08:00

以前每晚都 DIY 晚餐, 鬼咁滋味同健康,
這大半年來, 因工作關係, 日日都好夜先返到屋企,
差不多一日三餐都係食果 D 我最憎嘅超勁味精垃圾餐,
食到我口都 'wher' 埋, 而且又唔健康,
加上我本身又潺, 再咁食落去, 好快就瓜老襯,
所以由 12 月開始, 我都寧願收早 d ,
返屋企煮飯食, 但食完都差不多 10:30pm,
要等埋消化三個鐘以上, 上床瞓覺都要起碼 1:30am,
第二朝神咁早八鐘要起身返office, 超辛苦啊!!
家o下咁嘅時勢唔做又唔得,唉.....

因月中去上海時, 朋友用這款煲,只需半小時,
好快咁完成一煲入味嘅西洋菜豬骨老火湯,
超好味, 超方便, 超慳時, 超健康...超...咁囉!!
所以一直心思思, 心郁郁,
今日終於把心一橫, 一擲千金,
分期付款去買左個$1,976.00 個大烊嘅高速壓力煲,
返到屋企, 第一時間就即刻試O下件新玩具,
哈哈...我亦是用半小時完成'西洋菜陳臂南北杏蜜棗豬骨湯',
好味!!
以後每晚都可以再享受美味 DIY 零味精嘅美食喇!!

三個葬禮一個婚禮

2007-11-12T00:25:00.000+08:00

下星期, 紅白二事只是隔一天,
星期日, 朋友結婚, 要參加婚禮,
星期二, 朋友別離, 要參加葬禮,
今年已是第三次去他人的葬禮.

有點悕虛, 從小到現在,
已離去的朋友都有十個以上,
最深刻的一次是我小學二年級,
好姊妹,看着她病入膏膚,也幫不了,
直到她沒上學,不記得多少天,
我去她的家找她, 她媽媽跟我說:她不在,
我再問, 她去左邊? 點解唔返學?
她媽說: 佢死左.....
然後比左粒糖我, 叫我食左去.
死!這個字,對一個當時只是小學二年級的我,
所認知是永遠都再見不到她.
對她...有件事, 到今天我心仍然未能釋懷...

至於, 剛去世的朋友是我兒時認識的,
大家年紀也是相約,
昨天聽見他的不幸後,心裡很不舒服,
他是一睡不起的那種,
最近一次見他是幫我裝修現居,
很多他的片段在腦海裡翻動,
他短暫的一生, 由大大隻隻,
到突然中風, 手術之後變了另一個人...
那時看見他, 心中也不好受,
好的角度看, 辛苦了一生, 到最後可以舒服地離去,
沒有痛苦地返天家去了,也是一種幸福.

人生隨着年紀來倒數,
十多歲時, 大多數是同學朋友畢業禮,
廿多至四十歲時, 大多朋友及自己的婚禮及滿月酒,
以及聆聽大量朋友離婚的消息.
四十多歲時, 開始有朋友娶新抱請飲及朋友的葬禮,
五十打後, 葬禮可能陸續來(可能包括自己).

美味關係

2007-10-23T22:50:00.000+08:00

剛從上海回來, 過了一個非常開心的假期,
朋友熱情的招待, 他為我做出了很美味花心思的菜,
至今也回味無窮, 那份心意, 我用另一種心情品嘗,
甜在心頭, 把他用了一晚去為我預備的所有,
全貫心內...

亞星Miss

2007-10-01T23:22:00.000+08:00

今日開班, 去左一間男校,
由早上8:30 做到下午6:30, 人都顛,
太耐冇爬的關係, 兩隻手腫痛同起水泡,
那裡全部都係中一生, 睇見佢地都幾開心,
miss 前 miss 後, 但在當中看到一些是有未來棟樑的影子,
有些鬥志滿腔, 信心十足,
有些就臨陣退縮, 貪生怕死,
未盡全力嘗試, 就放棄,
之後, 藉口多多, 最鬼憎.
最搞笑, 有個學生,
突然同我講:'嘜你識講廣東話gar miss?
然後同佢 d 同學講'原來miss 識講廣東話架!'
我真係打左個 'eat',
o下! I'm Chinese,
佢以為我係亞星或者姐姐law.
sa wa di car!!

一生何求

2007-09-09T20:41:00.000+08:00

這陣子情緒非常低落,所以這幾天病了出來,
突然覺得很孤獨,究竟做人係為嘜?
好像事事不如意,真想快些結束吧了!
今天由荃灣行番去深井,
希望運動一o下, 多吸幾啖大氣, 病會快些好,
一路行,沿途是海邊,行到離海面很高的位置,
好有衝動想跳下去,一躍而進,眼前一黑回到寂靜,
常人常說, 知足貧亦樂, 無求無慾,
什麼是知足?在現今這個銅臭森林裡,那會是貧亦樂.
無慾與無求, 也是一種有要求的慾望,何以是【無】呢?
親人,朋友,伴侶也只是過客,因劇情需要, 所以出現,
每一章節都是命定,事前沒有通告,一切來得自然,
若果給我選擇死亡的形式, 希望是猝死,
在不知情的情況下就去了, 正如是也在不知情的情況下來了,
一切也是去得那麼自然, 亦是幾生收道的美果.

突然想起陳百強唱的'一生何求',這兩句令我很有感覺:
「一生何求,常判決放棄與擁有,耗盡我這一生觸不到已跑開,
一生何求,迷惘裡永遠看不透,沒料到我所失的,竟已是我的所有.」

功成身退

2007-08-17T23:56:00.000+08:00

突然覺得好攰, 可能所有任務已完成了,
17年前的今天是我人生最開心的一天,
因為你的降世,
17年後的今天是我最心痛的一天,
因你怪我不是一個好媽媽,
這幾天眼淚常常不自主地流下來,
是否我真的錯帶了你來這個你不喜歡的世界?
你痛恨我為何帶了你來,
但又拋底你?
你又可否知道,
一個沒能力把你們帶走,
又照顧不到自己的兒女的媽媽,
那種一生都自疚,自恕感覺,有多難受?

曾幾何時,我想走去另一世界,
一想到還有你們時, 便打消念頭,
因覺得還有任務未完成,
還想保護你們,
還想看到你們學業有成,
還想看到你們獨立懂事,
更加想看到你們各自成家立室,
可惜原來我多想了,
這都是我一廂情願的想法....

E3 2006 Nintendo Conference Wii Video 1

2007-07-03T00:02:00.001+08:00

Wii for All

2007-07-02T23:55:00.001+08:00

減肥大喜訊

2007-07-02T22:45:00.000+08:00

天下愛靚美女好消息!!自從 '任天堂 Wii 面世,
真係帶來我地一班...'嘩! 靚女'...以減肥為終身志願嘅一顆明燈,
我地可以足不出戶, 就能達到一個月可消毀十磅豬膏,
我地可以足不出戶, 就能享受到足以令我斷氣嘅大量帶氧運動,
我地可以足不出戶, 就能親身率先體驗2008年不經北京嘅 OH! WIN!
我地可以足不出戶, 就能一夜之間用盡奶力, 去挑戰部晒電嘅遊戲機.
我地可以足不出戶, 第日你就知味道, 手不是你, 腳亦不是你,
亞仔, 前日帶左來比我玩, 一晚比佢玩謝左,
又打網球, 又打Boxing, 又打保齡, 又跑步, 又打棒球,
又拋鏈球等等等.....家o下周身骨痛,成身好似比人中左一鑊咁.
搞到我都想買番部來 keep fit 同閒時做運動.

突然

2007-06-25T01:09:00.000+08:00

突然, 好想到沙灘 , 享受有着椰子太陽油味道的日光浴,
突然, 好想入東龍 , 享受由力發揮出汗水味道的刺激感,
突然, 好想潛落水 , 感受水底寧靜的時刻與獨大的空間,
突然, 好想放下一切 , 來一O下任性, 飛去邊際享受自我,
突然, 好想停低 , 回顧過去, 逃避將來, 思考人生的ON 車!!
突然, 好想瞓覺 , 回顧剛才, 白酒一枝 , 一飲而盡, 冧左!!!!!

夢未 . 再求

2007-06-15T00:20:00.000+08:00

小喇叭! 六合彩又唔 Q 中, 横財夢又再見財化水,
聽朝又要教鬧鐘 !!
仲以為可以請人做埋我果份 tim,
之後, 去遊阜啦! 環遊世界啦! 去到邊 , 就買到邊 ,
四周圍搜羅珍品返來賣.......hehe...諗起都爽呀!!!

之前, 唔多覺果條貼地 d 言論, 真係嚇到我地 lay 班孤兒仔連胎屎都再標多次出來,
咩都係 `遭殃' !!! 嘜 '遭殃' , 物 '遭殃', 鬼唔知權是 '遭殃', 普選又係 '遭殃' 咩`,
仲話說o向認頭日, 做大戲節目爆花匯演一横, 仲話有'中國人'字樣出現,
就應為至款係佢, 真係無BQ, 補充o下先啦!!
正如哲學家話齋
'喎是中國能' http://http//williamsin.blogspot.com/2007/06/blog-post_11.html
但我覺得...如果當日出現嘅係 ' 中國大碌能' 字樣嘅話,
會為全世界嘅 '中國能' 更加爭回一口氣,
因為更加張顯 '能' 是中國的大碌,
只有大碌能, 才會存在於中國,
據可靠文獻所記載 ,係無: 英國大碌能 , 日本大碌能,
又或者亞拉斯加大碌能等等......
所以,只有 '大碌能' 係 '中國' 嘅獨有事實係無可改變的.
若是真係爆出來真係'中國大碌能' 時出現因技術問題嘅關係,
而不停只在中國與碌能之中嘅大字出現重複又重複,
即是 '中國大大大大大大大大大大大................碌能',
我諗全中國十幾億嘅男女人民真係普天同慶,
身為 '中國能' 能在全地星人面前嘅獨有榮耀與特徵.
可喜...可...呵呵呵....!!
註: B (Banana)
大碌能(great green human)

深井糖水

2007-05-26T22:45:00.000+08:00

很多人都知深井有間財記糖水好出名, 每逢假日前夕及假期晚都人山人海,
有時午夜返歸時, d 車同人都排到出馬路, 好似唔洗錢有得分咁,
但我又唔覺得佢有咩好食,
起碼隔離完記茶餐廳嘅紅豆沙同綠豆沙好食過佢多多倍,
一間咁有名嘅....就連最簡單嘅紅綠豆沙都開粉漿煮到鬼五馬六,
一食落去好似食緊 BB 糊仔一樣, 樣子跟貼街招嘅生粉漿差無幾,
而完記就唔同喇....紅豆沙 D 沙真係煲出來架 WITH 原隻五頭果皮,
至於綠豆沙仲正, 除左五頭果皮之外仲有大量香草, 真材實料,
又香又清, 昨晚先買左兩碗放o向雪柜, 家o下一路品嚐,
一路寫 blog, 透心涼啊!!超正...

果間名過於實嘅....我認為只有芒果沙冰過得去啦!
不過, 我自己整, 仲好味過佢, 起碼唔會加糖水囉.

嘉頓麵包

2007-05-20T17:38:00.000+08:00

家在深井, 很喜歡此地方, 越來越鍾意, 以前每一年至兩年就搬一次屋 ,

本身我不太喜歡住樓, 而喜歡村屋, 曾經也住過西貢,

那處非常好, 什麼也沒有, 純粹住宅, 有種與世無爭的感覺,

空氣當然無得頂啦! 可惜地產發展的關係, 地盤進駐,

親眼目睹一棵估計有百年歷史的荔枝樹因在規劃內, 難逃一劫,

看着這棵無辜而無助的老樹被鉤的一刻, 有點心痛,

好似大樹謀殺案的目擊證人一樣,

那棵的樹幹起碼要七至八個人才可把他抱住, 到現在還常常想起那情景,

未幾因地盤的塵土飛揚的關係, 我三個月未開個露台門,

只見露台上的黃泥厚得可以在上面扶乩, 所以搬了,

搬回市區, 住了數年, 都是喜歡村屋, 所以選擇深井,

中學時期是在元朗讀書, 每日返學和放學搭車經過深井,

都會聞到嘉頓麵包的香味, 和生力啤酒的引誘(雖然當時唔識飲).

又會看見那處倚靠半山的三層村屋, 覺得住在此處的人一定好幸福,

因若肚餓時, 有麵包和啤酒的味道頂住, 所謂 '望梅止渴' 嘛!

而且面對住超無敵的大大海景, 真係我理想中的桃花源,

可惜現在的深井, 啤酒廠搬走了, 那無敵海景,

因起了很多嘜花園, 物半島, 及爛鬼嘜嘜台之後, 失蹤了,

好在嘉頓仍然保留, 每日仍然到時到侯就飄來一陣陣的引人垂涎的香味,

還有每晚的炭燒燒鵝超香味道, 而每日都有來自不同地方的人,

入來品嚐這裡馳名的美食, 好有小鎮的風格,

有錢的話....真的想買下現在住的地方來終老.

人生百態

2007-05-18T23:23:00.000+08:00

做了兩星期掌櫃 , 每日遇到不同類的人客 ,
例如: 超豐滿的中年女士拿一件 mini tank 叫我幫佢度 , 問我好唔好睇?
我只見 tank 在她身上 , 好像裱畫似的, 即是背心o向中間 ,
而兩側的肉是畫框, 我話件衫唔啱你 , 佢話係咪即係好肥呀?
當時都唔知點答佢, 又唔想講大話 , 只好話...女人豐滿 D 好 .
另外, 今日遇到的一個巨人, 試一件針織外套, 嘩! 真係好 Fit 呀!!
好似頂角羔蟹一樣咁爆 , 將好一件鬆身飄逸嘅外套,
完全沒有浪費到一點空間, 佢左照右照, 好似好鍾意咁,
但一聽價錢 , 即刻話 , 如果買番去唔啱, 攞番尼換第二樣得唔得?
我話你而家咪試啱左o羅 , 佢即刻話幫人買架, 返去比佢試左先嘛 ,
佢仲肥過我 , 嘩! 爆角羔蟹? 當然唔可以啦!
女人的潛在壓價本性, 簡直係人都顛 , 一件 T 叫你平一舊水比佢 ,
亞姐問我對歐洲鞋幾銀? 報價後, 佢居然話兩舊得唔得?
一對鞋我返貨都幾舊水, 我話不如我比兩舊水你幫我買好唔好?
還有好多攬攬震 , 無幫襯的極品 ,
不過都幾好玩 , 睇到好多人種, 有 d 好爽 , 一睇啱, 價都唔講, 就比錢攞貨走,
但有大量都係打死狗講價, 一於 lew 你減到低於批發價賣比佢先罷休,
家o下脾氣還好, 頂得住, 一些做了十多年的隔離舖都話,
大把極品都未出現, 做落就知!!

生意興隆...I wish and I hope.............

2007-05-01T23:29:00.000+08:00

與朋友合作的第一間 fashion shop 將於下星期一開張了,
好似發夢咁...感覺好似這麼近又那麼遠...又好似那麼近又這麼遠....
我喜歡模石過河的感覺, 我不喜歡一帆風順的虛榮,
可能是.....內在隱藏了一對反叛DNA, 遇強越強,
創作過程上我們也遇上一些放飛機、黑嘴瞼和比人揾笨 seven 的體驗,
所謂同行如敵國, 短短幾個星期已看了好幾宗.....
總之, 求人不如求已啦!
亦希望合作愉快...貨出錢入....旺丁又旺財啦!!!

赤背剌心

2007-04-09T23:46:00.000+08:00

轉眼又放左幾日無無聊聊的假, 本想去陽朔, 但計過條數之後, 想儲番 D 錢, 所以都係放棄把啦!!
直到今日, 因為實在太無聊, 又唔想 '耦' o向屋企, 所以又去電髮了.....哈哈
去了朋友那 salon, 由一點等到差不多五點先輪到我, 因不停有客光顧的關係, 我一直在等.... 還幫他招呼客人, 又無嘜所謂啦, 反正朋友同我講, 次次我在時, 都是有很多客入來, 佢話幾日假期都好靜.

本來約了細老頂去行街睇戲, 等大老頂補完習之後一起去晚飯的, 兩老頂準時八點到 salon, 但我還是 progress of my hair construction, 要佢地等有 d 過意唔去, 還要佢地等到九點幾, 所以去食佢地最至至至愛嘅 '元氣壽司' 注意: 細老頂是曾經因一份 '老麥漢堡餐' 而一口氣食左 48 碟壽司(每碟係有兩舊) 的記錄保持得獎者, 一坐底, 兩兄弟好開心咁 take, take, take.....take, 跟住叫 waiter 姐姐 '唔該' , 我即刻計計計....o下!! 已經 $359.00 未計加一, order來了，我只食了兩舊壽司，兩塊魚生，跟住眼前的景況是, 全碟空, 細老頂問 : 媽咪可唔可以再叫呀? 我看着這兩個身型巨大, 年青有為, 可能係明日巨擘的肥瘦雙煞...怎可說不呢??? 好好...叫啦..叫啦...!!! 再來一個 round, 兩老頂又再開心地 take, take, take...
最後埋單 $466.00 但我只食左三舊壽司, 兩舊魚生, 半碟豉油碟咁多嘅蟹子沙律.
之後, 我問佢地飽唔飽?大的話50%啦, 至於記錄保持者話...媽咪不如去食魚旦河囉!!

但係我家o下真係好肚餓呀!! 比咁多錢又食唔飽, 真係好肉赤, 赤到入心呀!!

天不清, 朗不明

2007-04-05T11:44:00.000+08:00

清明時節眼甘甘,
路上行人震騰騰,
避寒(鼻鼾)中心何處揾?
亞伯老點橋底有.

一段超好笑的ICQ對話

2007-03-26T22:56:00.000+08:00

A：你叫什麼名字？
B：B
A：我是問真名。
B：ICQ上有。
A：說出來好嗎？
B：為什麼要說？
A：說出來才好嗎。
B：怎麼好呢？
A：因為是我問的嗎
B：你問的就不能不說嗎？
A：我不是壞人呀。
B：壞人貼標籤了麼？
A：沒有啊。但我是好人呀。
B：請把好人證書傳來。
A：沒有啊。但你說才表示有誠意交朋友啊。
B：chankabo^_^
A：打汗字好嗎？
B：我打字不出汗。
A：我是說打你的名字。
B：我的名字惹你了嗎？
A：沒有啊。
B：那幹嘛打我的名字？
A：我是說打字。
B：哪個字惹你了？
A：唉，告訴我你的電話吧。
B：塑膠的，紅色。
A：不是，我是要你的電話。
B：我的電話我家還要用呢，你想要自己去買。
A：不是，我是要你把電話說出來。
B：電話是說出來的嗎？我還以為是工廠做出來的呢。
A：不是，我是要你的電話號。
B：在電話上嵌著呢，拿不下來啊。
A：我是問你的電話號是多少。
B：十二個，十個數字鍵，一個米字鍵，一個井字鍵。
A：我是問電話號是幾多。
B：從1到9，0在後邊。
A：我崩潰了！
B：你哪不舒服？
A：不是啊。
B：那怎麼崩潰了？絕症嗎？
A：問不到你的電話了啊。
B：電話對你很重要嗎？
A：電話是幹什麼的，不就是用來說話的嗎？你要告訴別人,電話才有用啊。
B：電話是用來上網的。
A：電話還是用來聊天的啊。
B：是啊，我們不是一直在聊天嗎？
A：哪聊了？你這半天什麼都沒說啊。
B：我說了幾十句話了。
A：唉，你都把我說暈了，下次再聊吧，byebye
B：Bye Bye

於(秋夜小棧☆~~煙火下的季節) 論壇找到的

唔多之旅

2007-03-08T14:12:00.000+08:00

'小吳哥'

今次孖妹出走去了柬埔寨, 但實際去吳哥窟只是二天半, 有些未究喉...

'微笑吳哥'

這個地方有很多很宏偉的建築遺跡, 處處皆是廟宇, 而我們所遊覽的只是精華, 若是到達每一個遺跡和細心欣賞, 起碼要一星期或更多, 因範圍太大, 有些仍然因有地雷未拆掉, 所以未對外開放, 現在可以遊覽的, 都是在2003年才開始對外開放.

在看見那些巧奪天工, 精雕細琢的浮雕, 在想以前的人真是很得閒, 同好悶, 幻想力超豐富, 而且這樣宏大的建築同雕刻, 要有很多的人力, 藝術天份, 同心機, 好像當時每一個人都是天生有藝術天份似的, 每一幅構圖都有歷史故事, 加上導遊的講述陪襯, 更覺前人比當今的所謂設計師九牛一毛...

'女王宮'

'互相揮影'

唉!想update好耐, 可惜家中牛廢 PC 又罷工, 家o下o向公司鬼鬼鼠鼠咁update, 真係想寫多 d 都唔方便.

新年出走記之一

2007-02-10T00:38:00.000+08:00

今個新年, 唔去泰國了, 同朋友一起, 係去越南同柬埔寨.
皆因是次出走去有少許落後的勝地及遺跡, 所以朋友同我都買左又租左幾本有關嘅書, 同埋上網搵料, 來作好準備, 發覺吳哥窟係有識中文同講國語嘅導遊, 一揾到料, 我就即刻打長途同send email 比佢地, 想book佢地做吳哥窟的導遊及司機, 可惜太遲了, 佢地o向果幾日都有booking, 因為係新年關係, 很旺, 但我仍然繼續揾, 有些email 仲未覆我, 若真係到出發前都揾唔到, 唯有o向入住嘅酒店睇o下有無計, 再揾唔到咪參加 local tour 囉! 不過, 我唔想, 網上旅遊討論區, 說他們自己揾的華僑導遊都很不錯, 所以都希望能揾到一個, 來好好介紹吳哥窟比我地認識啦!

我愛韓國佬

2007-01-30T23:36:00.000+08:00

這兩三星期好頹, 日日都係煲韓劇, 已煲左好幾套, 當中喜愛上一位韓國佬'吳智昊', 他貌似我兩個老細嘅經手人後生果陣, 在'新進小職員'那齣劇最似, 比經手人更正, 睇埋'幻想情侶'後, 更愛死佢, 這兩套都係喜劇, 而家正在揾緊佢有份參演嘅其他劇集...幣!點解我會咁嘅??? 我我..我從來都冇偶像, 只是在小學時.....做過汪亞姐一陣粉絲之嘛.

搵你笨實

2007-01-15T21:54:00.000+08:00

近日, 我部牛廢 PC 成日玩罷工, 洗機都洗左兩次, 距離死都時日無多, 衰開有條路, 連帶部殘廢通訊器也入住 ICU, 對話會時有時 , 也隨它媽的心情喜歡響就響, 睇怕係時候再覓新歡了.

上星期日, 蘋果日報'名釆'鍾偉民先生所寫的'低等動物', 我看後認同得拍爛手掌,好!

內文如下:

讀友以為我愛罵人，其實，我從來不罵人；因為我罵的，都不是人。
不是人，究竟是什麼呢？在生物學的分類上，該不屬於動物門，哺乳綱，靈長目，人科，人屬，人種；只能是……低等動物。
什麼是低等動物？腔腸動物、節肢動物、甲殼動物等，不但沒有脊椎，腦袋小得可憐,甚至沒腦袋，都算是低等動物。所謂的腔腸動物，嘴巴和肛門，還生在同一個地方，腦袋，如果有的話，一般塞滿大便；思辨能力，如果有的話，大概相等於一個認為「民主等於長毛，長毛不好，民主於是也不好」的維園阿伯。
換句話說，低等動物跟人類最大的分別是：低等動物，不能辨別是非和好壞，不關心自身以外任何生物的生存權益；再換句話說：不關心自身以外任何生物的生存權益，不能辨別是非和好壞的，就是低等動物。
低等動物，像便利店一樣，總有一隻在左近。「痰有菌，你知不知道隨便吐痰，會危害別人？」你問某甲。「我不知道，我愛怎麼吐，就怎麼吐！」某甲這樣回答，就是低等動物。「嫖妓不好，你知不知道把女人當玩具，更不好？」你問某乙。「我不知道，女人好玩，大爺有錢，玩得她們四腳朝天，就最好。」某乙這樣回答，就是低等動物。「你知不知道向陌生人噴煙，要人吸入你吐出的毒氣，是不道德的行為？」你問某丙。「知道又怎樣？人人是這樣，向來是這樣；我也是這樣，十分正常。」某丙這樣回答。某丙和「人人」，其實，都不是人，是低等動物。
衣食足，理論上，就該知榮辱；可惜，有些地方的生物，不是這樣的，吃飽了，別說榮辱，連善惡，對錯，都不知道。低等動物多，最有可能，是遺傳基因出問題，由脊椎動物，退化為無脊椎動物。大家愛講「開心指數」，我發現了一條定律：開心指數的高低，跟一個人身邊低等動物的數量成反比。簡單說：身邊賤物越多，越不快樂。

非常最認同是這段:
「你知不知道向陌生人噴煙，要人吸入你吐出的毒氣，是不道德的行為？」你問某丙。「知道又怎樣？人人是這樣，向來是這樣；我也是這樣，十分正常。」某丙這樣回答。某丙和「人人」，其實，都不是人，是低等動物。哈哈...哈...係囉, 唔揸車唔會死, 唔講電話唔會死, 你吸毒我唔會死, 但唔呌氣就一定死.

如果話因為民主社會自由'鍾意'說不需立例去禁煙, 無問題~ 可呼籲有關煙民將原枝香生吞落肚,只吐喳, 或者只可吸入, 不可噴出, 又或者每名虔誠煙仰者, 各人自備一個超舊式金魚缸, 每當癮發時, 即抽出來把它笠上頭, 好似以前粵語殘片 '十兄弟恕海除魔'嘅造型, 這樣,一支香則可食成日, 因雲霧不能向外去, 罩住會不停在魚缸循環再吸噴, 非常環保, 頂癮!!

又到聖誕

2006-12-14T15:51:00.000+08:00

希望快些到下星期五, 那天一放工就背起背囊飛奔去機場, 再飛去桂林, 再搭夜車落陽朔西街, 近十年每逢假期前夕, 都是用這樣偷時間的方式去旅行, 可以慳時間嘛.

雖然去過陽朔多次, 但聖誕節就未曾試過, 去過的朋友說那裡的聖誕氣氛很好, 可能百分之 80 都是西人, 整條街的酒店,商店都是為西人而設, 西街的名字也是由此所得, 除了感受一o下有中國 crossover 外國的濃烈聖誕節慶外, 最主要都係爬石, 不過, 今次肯定好凍, 上次復活節第一日上月亮山爬時, d 手指都凍到僵左, 成隻手都痺晒, 爬唔到, 何況聖誕...不過, 算啦!!爬唔到咪遊覽o下其他地方囉, 橫掂去左幾次都只係一開眼就爬石, 真係 '日出而作, 日入而息', 同返工無嘜分別, 但好好玩!! 快 d 到下星期五...

對‧愛‧錯

2006-12-06T23:14:00.000+08:00

愛情是無色, 無味, 看不見, 捉不到, 無重量, 無實質, 可令人開心幸福, 亦可殺人無形, 說...是靈丹妙藥, 也是殺人不見血, 鋒利無比, 來時擋不住, 走時拉不回.

相戀時, 這麼遠, 那麼近,
分手時, 這麼近, 那麼遠,
同樣的文字, 不一樣的感覺,
感性地開始, 理性的結束(如果可以的話).

所以我比較喜歡暗戀, 單方面開始, 亦可隨時單方面結束, 免除了對方言語行動上的傷害, 沒希望, 就沒有失望, 得不到的東西永遠是最好的, 存在着無限幻想空間.

忽然想起李克勤唱的《愛不釋手》其中幾段:

然後湊巧與你能夠手牽手　誰又會知我們有多久
誰亦明白火花多猛烈　始終燒不到這世界盡頭
但我未意會這麼快　便行近分手的門口
若抱在臂內也不夠　承諾又哪有力去守

如難忍手　無法廝守　寧願握手　別要揮手
預了拖得你手　便要分得了手
難道不知道你慣於墮入愛河
而喜歡被騙的我　曾誤信我對你估錯

從前相愛　漸變相處　然後縮手　然後變生疏
從前不只你懂得說一聲你好
但等不到一個再見會重遇過

常在我的世界和你手牽手　誰又會知我們有多久
誰亦明白火花終有日耗盡　但為何霎眼停了手

'從前相愛　漸變相處　然後縮手　然後變生疏'
'如難忍手　無法廝守　寧願握手　別要揮手'
曾經經歷過的........都很有感覺.

無聊的一天

2006-11-30T00:55:00.000+08:00

今日午飯時, 在街上看到一位阿姐炒栗子, 炒得很起勁, 突然好想奪去她手中的鏟, 然後由我痛痛快快去大炒, 炒得比她更起勁更狠, 但我怕她報警之後, 警方會控告我劫鏟及侵佔強行炒人大獲罪, 所以便打消念頭.
之後去了食麵, 我是該麵舖的常客, 這裡有一位怪常客, 已碰見過她多次, 今天也不例外, 為何覺得她怪? 第一次碰見她是與我同枱, 她一坐下來便order 一碗菜米, 一柸凍飲, 表面沒什麼不妥, 跟着她會將一包新的紙巾拆掉膠袋, 一叠紙巾完完整整放在枱上, 然後再拿另一包紙巾, 抽兩張用來舖在枱上, 之後拿出她所買的報紙雜誌一大叠放在附近, 菜米來到她便開始食, 食到一大半便開始咪報紙雜誌, 她不會理會有多少人在等位, 待她細味完之後, 埋單鬆人時, 那棟完整豎立的紙巾下場是與食剩的菜米長相廝守, 係完全未用過, 次次如是, keep 得非常之好, 替包不幸的紙巾不值, 沒有給它應有的工具價值崗位, 而且好唔環保.
下班之前,想不如晚上電髮, 就去朋友那間salon了, 電完之後, 都已經10:30pm, 所以與朋友再食晚晚飯(因6:00己食了晚飯)這頓是晚晚飯, 回到家已是零晨, 覺得今天真是很無聊, 所以便寫了'無聊的一天'.

山癡

2006-11-21T23:32:00.000+08:00

我很喜愛大自然, 所以喜歡行山, 2002年自己一個人揹背囊便去了尼泊爾trekking, 過程中感受到什麼是我的享受, 有想過去珠穆朗瑪山, 單單那張登山證已經是40萬港元, 這是幾年前的價, 還未計算其他, 朋友成功登頂合共用了過百萬, 幸好有贊助, 在這看來, 我想要中六合彩3000萬, 才可作打算了.

另外, 我最想最想去的就是位於巴基斯坦和新疆邊境上的K2 (Mt Godwin-Austen)戈德溫奧斯丁峰, 她是世界第二高峰，海拔8611公尺(28,250尺)，高度僅次於珠穆朗瑪山聖母峰的8848公尺, K2 有殺人峰之稱(The Savage Mountain), 目前是全球公認上最難攀登的山峰, 1909年已有人嘗試攀登, 直至1954年7月31日兩名意大利人由南側(South Face)上成功登頂, 她的北側(North Face)是最難, 差不多是峭壁, 非常陡峭, 1982年日本隊成功首登, 直到目前就只有198人成功登頂, 可以成功折返的人也僅有100人, 而未成功則死的有57人, 平均每三名登山者, 就可能有一個人死, 其實上山容易落山難, 很多時登山者都是死於下山時候, 因勝利的心情而疏忽了安全意識, 又或是沒有計算到自己的體力能否去應付比上山更艱難險峻的下山坡.

我是一個愛在大自然冒險的人, 雖然我沒有機會在她身上留下足印, 但她的傲氣和風姿凜凜, 令我一見鍾情至今.

阿蛇學友

2006-11-11T21:39:00.000+08:00

剛剛開學的一個短期課程, 我上得非常之開心, 因 miss 好靚女(似湯螢螢), 而百分之80都係'流算血, 硬漢子, 嚇死老媽子'的警察叔叔, 佢地答問題同發問都係同審犯咁審一樣, 好爆笑, 例如 miss 比幾個屋村樓宇的圖我地選擇認為最易去爆的一個出來, 然後會問點解, 佢地將所有過程用包抄賊佬角度去講, 上堂講, 如果有三個單位用來走粉, 我地會揀邊個? 我鬼識咩! 但佢地就即刻問: 係大路定小路? 係咪屈頭巷?corner 位兩邊係咪有門? 有冇天文台? 樓上舖定街舖? miss答: 兩邊大路唔係屈頭, 得一邊門街舖, 跟住佢地揀左中間果間, 但突然有人問: 有冇後門架? miss 話冇, 跟住成班硬漢子話:冇後門? 咁點走佬呀? miss 話 d 差佬......突然成班硬漢子大聲話...係差人, 哈哈哈....哈...我即時笑到爬左o向張枱度, 真係好開心...差人同學...

妖孽膠強

2006-11-09T23:46:00.000+08:00

仲有一隻千年姥姥 '妖孽膠強',佢一掌將'雞珍'打出來, 等佢出來替死, 嗱嗱...嗱..人地美國佬就精喇, 保住自己隻'日本馬'先, 佢地計過可能有大傳染病將會爆發, 源頭都可能係大爛地, 所以膠強有此一着, 先做定借刀殺人 d 手腳, 用雞珍已經入左細胃橫頭嘅有利因素, 意圖有企圖去嘗玩用紙包火, 燒就燒死雞珍, 過左骨就燒晒炮仗咁領功, 衰左香港就領野.

我o向公仔箱見到隻膠強果種奸, 係由佢骨髓出來, 就火都尼, 成個香港比佢當猫玩老鼠咁玩, 但可以點樣 ? 只望雞珍醒扒, 唔好丟架啦! 如果唔係, 全藍星人都會追住丟佢, 至於隻膠強.....同我拉出去斬.

細胃好似唔包括精神病科個可, 唔怪得啦.

膠字係粗口鞋音.

為禍人間

2006-11-09T10:38:00.000+08:00

前牌, 我每日都祈禱, 希望'珍豬雞'千祈唔好中標, 真可惜, 上面亞神應為地星有人滿之患, 所以來一擠'雞珍滅藍星', 亞神今次真是大弄人, 比一隻咁究薑嘅'珍豬雞'去玩起全藍星人條命, 一隻o向'禽流感'叫人食雞, '沙士'一爆佢就即刻禽禽青溜咁用契弟走得摩嘅speed→即閃, 家o下仲比大爛地作為一粒'雞子', 打入世衛, 以後大爛地有咩'絕命傳染'呀!'隱世絕症'呀!'騎呢怪病'呀!'共產你感佢唔感'呀!'人流菌'呀!等等等....等, 大爛地就會remote control 隻'珍豬雞', 可能在'珍豬雞'出任期間, '大爛地'唔會出現'旅遊警告', '大爛地'亦可能利用'真豬雞'無Q 用(IQ & EQ)嘅人頭豬腦去走運全地星都響譽盛名,'大爛地'band 循環再用'落背耳'食你唔會唔死超環保藥用品, 藍星從此就 '幣家火,地星有雞魔'.
其實香港最慘, 大陸今次o下o下用'香港之光'來曹操借東風, 做得好係中國人, 做唔好咩獲嘅就係香港人, 睇'clever 曾'今次反應咁保守就知, 隻獲將會好重, 雞珍中標後, 全香港人都鬧, 而世衛今次選佢都好有問題, 佢地只睇表面數據, 唔深入探索香港沙士如火如荼時'雞珍'點解第一個鬆人, 一起百抬, 一沉億踩, 什麼什麼'香港驕傲''香港光榮'...我呸, 用300條人命換一個貪勝不知輸嘅'撒旦珍豬雞'.

行夜路

2006-11-06T11:03:00.000+08:00

星期六晚與兩個朋友參加左'盲俠行',起初以為是行山路, 原來是行馬路邊, 過程上看見好多人都行出馬路, 都幾危險, 主辨機構下次再搞的話, 一定要注意這點, 雖然是保險公司主辨, 但始終都是要顧及善長人翁的人生安全嘛.
那晚的狀態不是太好, 前一晚沒睡得好, 星期六早上八點就起床, 入了東龍島爬石, 雖然沒咩繩同扣, 因不會再回家而直接去夜行的關係, 所以咩左替換的衣服, 沙灘蓆(諗住行完瞓沙灘), 梳洗用品, 爬石鞋, 粉袋及安全帶, 個背襄大約都有十多磅重, 東龍一出來, 便去了西灣河體育館沖涼(好似露宿者一樣), 之後再落灣仔會合朋友, 晚飯後, har 到10:30先去報到, 差不多12 點幾先起步, 行呀行...行呀行...大約 3 點 4 我已到左香港仔檢查站, 朋友們未到, 蓋印後, 發現左有沙灘椅!! 嘩!!超正!!! 於是就飛身上去, 點知等呀等, 等呀等, 瞓著左, lay 一瞓就中計了, 因為 d 疲累全部出晒, 朋友差不多 3 點 50分先到, 足足瞓左半粒鐘, 之後果段就慘喇!

個背襄越咩越重, 我一路行時, 見到所有平滑而又大塊 d 石頭同埋海邊 d 駁, 全部都係浮現一張張床的形態, 仲好舒服咁, 好在有好靚嘅夜景來引開注意, 可惜我無帶相機, 那晚是 15 , 月亮又大又圓又光, 天上又無雲, 真係好靚, 我地大約 5:30 到終點, 有多人已瞓左沙灘上, 本來我都想, 但氣溫低同埋我件衫因濕透而很凍, 好想快 d 番屋企舒服地瞓落自已個狗竇度, 7:20am回到深井, 之後像死了似的大大大大大......昏迷了.

煩老

2006-11-02T00:07:00.000+08:00

兩老的熱情, 有時令我們做細真的吃不消, 是否養兒100歲, 長憂99? 有時很想回家吃飯, 但每次事先通知之後, 回家我必定會看見滿漢全席在眼前, 老人家收到料之後, 便即刻走到街市買仔女所喜歡的一切, 然後回家幹一大場好戲來滿足兒女, 當然, 回到家看到自己所喜愛的食物是真的很開心, 但...一想到兩老...他們真的老了不少, 我不忍亦不想他們辛苦, 刻意地為我回來吃飯,而要上落二百多級樓梯去買我所喜歡的餸菜, 正如我很喜歡吃雞, 每次事先張揚後, 必定如願以嘗, 所以我今日6:00pm先突然告訴老媽, 我回來吃飯, 不想他們辛苦, 但...老媽意說'我去買條魚啦', 真係吹到啤啤脹!!

回家後, 老爸不停問我問題, 但要在不頂撞的情況下去應變係有些難度, 真的有點煩, 感受這情況後, 令我明白下一代的感受...最好唔好煩我.

三人行

2006-10-30T22:43:00.000+08:00

昨天又再與朋友一齊行山, 今次多了一個戰友, 我們選擇行港島徑的'柏架山自然徑', 鰂魚涌起步, 沿路是一路都是上斜, 我因前一晚醉冧左, 加上肚痛又肚痾, 痾到腳軟同酒未醒的關係, 成日就好似發夢咁, 狀態係有行山史以來最差的, 但這路很不錯, 好古老的一條家樂徑, 仲見到松鼠, 係呀! 松鼠呀! 仲閃得好快咁違例過馬路,上埋樹, 之後我地一路上, 去到一個分叉路寫住'金督馳馬徑', 原來 LAY 條路係上山頂, 我地又唔識, 所以冇選擇, 但我下次會試行, 我地行左冇幾耐又見到另一個指示, 去睇牌時發覺側邊有個細入口, 個牌寫住'康怡花園', 我地商量後選擇了這條路, 全程是山路, 襯晒我, 難得是, 原來這條路的風景真係好靚, 更有山谷之氣勢, 一路聽住隱隱流水聲, 有樹蔭, 好正, 沿途都有人會相反方向行, 全程由起步至西灣河為終點, 大約個半鐘至兩個鐘左右, 我應該會過兩個星期再來, 會由'金督馳馬徑'上山頂, 同埋多一次由此行去大潭.秋天完之前會好好把握行山的樂趣.

秋天我真係愛死你呀!

行山孖妹

2006-10-23T00:11:00.000+08:00

今日去了行山樂, 與同學兩個孖妹一齊由我家後山出發, 本來想行到大欖水塘之後便打回頭路, 但同學想一氣呵成去到元朗大棠, 所以便去吧! 我地一路行一路傾, 唔覺唔覺又行了好多段, 慢慢行, 去欣賞沿途風景, 感覺好舒服, 秋高氣爽一點也沒錯, 不足四小時便行完, 這條路線不算難行, 全程石屎路, 水塘風景又靚, 我怕有山賊, 所以拾左一根尖頭木方, 以便不時之需ar ma....去到大棠便搭van去到元朗轉車去燒鵝聖地, 飲飽食醉後, 大家都想下個假期 ' 再 lai e 哥'

新蒲崗

2006-10-18T23:06:00.000+08:00

這個幾月, 每逢星期一,三,五下午都要過去新蒲崗公司幫手, 所以我開始踏足這個地方, 新蒲崗一路給我的感覺是一個舊區, 但當看到那種車水馬龍, 熙來攘往的情景,, 有一點時光倒流回二, 三十年前香港, 尋回一絲昔日八,九十年代如日中天的繁榮感覺, 一個很舊式的工廠區, 大有街, 三祝街, 四美街, 五芳街, 六合街, 爵祿街, 製衣業在這佔了百分之90之多, 當我走在以上的街道時, 看見四周那些六,七,八十年代的建築, 古老的大招牌, 配上街上人來人往的擠擁, 由其覺得在這種繁榮工廠區食的'餐蛋麵','凍奶茶','奶油多留邊',蛋撻'還有菠蘿飽'等等...等等..都真係特別好味, 我都是最喜歡這種有生命地川流不息的工業情懷.

遲來的愛

2006-10-10T23:10:00.000+08:00

近日喜歡了番茄, 本來對這存有抗拒及討厭, 但不知為何前陣子愛上了, 無論打邊爐, 煮米粉, 滾魚湯等等, 都愛上用它來做配搭, 以前一嗅到那酸味, 已敬而遠之, 但這一刻.....不知何時愛上它, 沒有了它, 好像什麼都失了味道.
另一, 是唐萵, 不是每個人都喜愛, 以前打邊爐時, 若有唐萵的味道也吃不下, 但現在竟然跟它談起了戀愛來, 由其與打邊爐這第三者一起時, 更加有刺激感, 有些時候我在想:'我是否快要不久於人世呢?' 好多時, 都是有突變事件發生於人在臨終前, 忽然改變了她的生活喜好, , 例如很多人不吃'苦瓜', 但他/她忽然喜愛上來的話, 就說你已經進入下半世了, 只因'苦瓜' 的另一名稱是'半世瓜'.

生日願望

2006-10-03T22:41:00.000+08:00

前晚同 D 朋友BBQ, 好開心!多謝RU媽鬼咁好記性,同埋枝德國靚靚紅酒.

尋日係我又老一年的日子, 好想做自己想做的事, 所以一個人入左東龍, 以前每個星期日都去, 入左去差不多都有十年多, 發覺而家每逢假日, 這個小島越來越多人, 船埋岸時, 遠遠已見到有踩冧碼頭o既潛在危險, 跳上岸時, 我要大聲叫'借借', 但 D 人係聽唔到o既, 幾經辛苦先上到岸, 但唔代表可以行到, 有 d 人前後都咩住背囊, 將只得三尺闊o既獨石橋, 剛剛好卡住, 唔通叫我跳海游過去? 大哥比條山路我行o下好喎..! 一路行入去一路只見好多家爺仔乸, 奶奶新抱, 姨媽姑姐, 法拉利 BB 車隊, 一喼二喼拖住行出來, 以為東龍機場己啟用, 披荊斬棘行到去山上, 一睇到成個山頭都係五顏六色, 密密麻麻, 嘩!...'東龍豪庭, 顯現眼前', 我諗, 如果 d 營有復式o既話, 佢地都亦會密佈山頭, 一個本來好清靜舒暢的地方, 而家已變成西貢 MK.

我去到李太'士多'處, 亦係座無虛席, 人山人海, 李太是一個大好人, 由我第一日入去到現在, 她都係咁好笑容, 我已太耐無入去, 一去到她就送左枝私伙秘製冰鎮'花旗參菊花蜜'比我, 超正!, 我最鍾意佢地o既'魚片旦菜米'同'北菇餃',必食! 我食左碗我最喜愛o既'魚片旦菜米', 好滿足呀! 到比錢走時, 李太同我講 XX 拍拖喇, 你知唔知? 其實我已知左好耐...

那刻我心情沉左落去...我同李太講, 果個正衰人(我好想講果個正仆街), 但我驚嚇親老人家, 然後精簡地交代幾句給她聽因由, 我便去爬石, 腦裏底片即時浮現番以前 d 唔開心野出來, 到今日個腦都仲係浮緊, 心中不忿條仆街, 揚得佢, 仲帶埋入去東龍島show off, 其實我真係唔想o向咁o既日子, 聽到 d 咁大吉利是o既野, 搞到咩mood都無晒, 連家人夜晚同我慶祝都無心情, 正仆街!

生日願望:朋友家人個個身體健康,包括我自己在內.

而仆街o既就繼續仆街, 仆到六體投地, 一體不能起, 希望這個願望唔止要心想事成, 仲要萬事勝意.

希望在明天

2006-09-21T23:29:00.000+08:00

老爹開始療程, 打了第一針, 全個療程合共30針, 看見白髮蒼蒼的他由不相信, 到證實, 到沮喪, 到想逃避, 到自怨自艾, 到面對現實的過程中, 我用了自己的體驗來開解他, 雖然是有點難度, 但盡量去做.
回想自己發生事時, 不告訴雙親, 因怕他們對着我哭及擔心, 言而因證實是事實時, 要作第二次的大手術(一個月內)之前一晚, 妹妹告知了媽媽, 當晚要作其再做手術的心理準備, 繼而又沒心理準備地突接她來電, 只聽到啜泣聲, 我說是否媽媽? 但眼淚已直流在面上, 還扮無事說: '咩事?' 本身自己心情已經15,16, 仍然扮無野, 她埋怨我為何不告訴她, 我說'沒必要, 因我不當它是一回事, 只是變種傷風感冒之嘛!' 鼻酸得已奄不住扮堅強而強忍的情緒, 她已哭出來, 我真的很難受, 為何要生母這樣痛心? 告訢自己: 我要開心地面對這突襲的不速之客, 做手術之後及接受療程時所受的, 以及後遺症, 我也不會讓她知道我的情況, 療程是我獨自困在一間只有電話, 電視, 一張床, 及一個浴室厠所的房間幾天, 食一粒超高輻射的藥, 護士們不會入來, 她們在病房門外指導我如何進行程序去食這粒她們認為是攞命的藥, 那段時間,飯只是放在門口, 水亦只是放在病房門外, 不許任何人探病, 因藥性是高輻射的關係, 每日有一個像out break打扮的人來測輻射, 舌頭沒感覺, 嗅覺也遲鈍, 頸的位置像成億上千萬的螞蟻同時爬行,之後....頭髮掉了一部份, 味的嗅覺從此失掉了, 正如我聞到是魚味,但食時, 只靠嗅覺來斷定是魚, 味覺已早早say goodbye~~
只因有所經歷, 老人家要面對現實時說了: 夕陽無限好, 只是近黃昏. 我回應: 黃昏過後, 就是翌日的晨光.
我想我的意志是比人強, 可能是由經歷所磨練吧!
希望老爹能捱下去, 他的女兒也可以, 他一定是沒問題的.

回魂

2006-09-17T00:34:00.000+08:00

前陣子, 突發的兩件驚訝事, 現已平伏了,回魂了,人生無常是必然.
這兩星期我一直以為是瞓lai頸, 痛不慾生的感覺, 認為食止痛藥可解決, 但通通都無效, 終於去了一個自稱為少林高手的cheap orange, 佢條XX..將 D 極臭O既藥油倒落我個頭殼頂處...之後同我lock頸, 果晚我就成晚瞓唔到, 痛到要兩隻手托住個頭先起倒床, 日頭連擰一擰都痛到眼淚水bill出來, 動彈不得, 後來頂唔住去睇左真正高手, 佢一睇就話我頸骨吞左出來,移左位, 嘩....唔係卦! 老友? 佢同o拍番入去,我即時痛到 d 眼淚係自己流出來, 但...起碼條頸可以擰得啦, 雖然家陣都痛, 唉.....!

家陣又要忙做功課, 也忙幫朋友做數, 但一想起國慶BBQ, 我就好高興, 希望快 D同 D 老死聚舊啦.

心不想, 但.......事成

2006-08-08T23:11:00.000+08:00

對上一篇寫了生、老、病、死,
但...翌日我的朋友及至親應現了,
'有些人只經歷生與死, 一種比較乾淨俐落的過程.'
朋友...乾脆俐落地...只經歷了...生之後便死於意外...
'有些人的經歷會加上病來添色彩, 來感受軀殼肉體的神經反應, 在痛苦中體會理性興感性的糾纏.'
至親...正在經歷着...
一星期內要接受了這兩個極刺激的消息及要面對極大的體驗...

時光可以倒流嗎?
如果可以的話, 我是否能可以阻止...朋友不死...至親沒病??
為何心想事不成, 而心不想的...它給我去把通通事成???
好hurt...

生、老、病、死

2006-07-27T23:18:00.000+08:00

人生無常,
今天發生的事, 昨天猜不到, 今天知道之時...明天便要面對,
生、老、病、死...
有些人只經歷生與死, 一種比較乾淨俐落的過程.
有些人的經歷會加上病來添色彩, 來感受軀殼肉體的神經反應, 在痛苦中體會理性興感性的糾纏.
有些人把四個經歷都走過, 但...結果都是因走過而結束為終結.
你說那個是最可取, 我說:人一世, 物一世, 四個階段都必須要經歷, 才算不往此生.
每個人都要死, 人的一生, 是否每人都可以如願以嚐呢?

溫柔不是我本性

2006-07-18T22:28:00.000+08:00

有時想 '可能出世時 key 錯性器官的關係, 一身內在都很剛陽氣, 只有外表似女人, 行為動作都是全完男仔頭, 講野永遠粗聲粗氣, 人家咪咪掩咀笑, 我就橕大口哈哈哈大大笑, 笑聲震天, 動作之大, 令人為之側目, 又不懂解溫柔, 男性只把我當作兄弟, 女性就說性格爽直, 點解一定要有個形容詞給我???性格男仔, 有罪嗎??

日前與朋友通電時, 她就語重心長的勸我可不可以溫柔一些, 才可找到另一半, 我的回應是, 我就係我, 到現在一點也沒變過, 為何要改變, 改變了就不是我, 自知其實那個男人不愛溫柔?? 但此終真我性格才是真正的我, 來...拿兩打'藍妹', 今晚不醉無歸...飲!!!

香港女仔麻Q煩

2006-07-10T12:57:00.000+08:00

以下係拍拖經常發生o既事,係由我朋友forward比我的.

男：今晚妳想食乜野？
女：是旦啦！！你話事
男：食壽司好唔好？
女：天寒地凍仲食Ｄ凍冰冰野．．．
男：咁去打邊爐啦，天氣咁凍，打邊爐就最正
女：我前兩日先打過，成日打好熱氣．．．
男：咁去食泰國野或者韓國燒烤好唔好？？
女：都話左熱氣啦，仲要我食呢Ｄ野，你有冇心聽我講野架．．．
男：咁去 POKKA好唔好？？ｏ個度Ｄ SET DINNER都幾好食（開始有Ｄ無奈)
女：POKKA好多人，唔想排隊
男：咁去"鋸排 "好唔好？？
女：唔想食咁多肉，好肥架．．
男：冇人叫妳食晒件"排"，或者妳叫碟意粉又或者其他野都得架
女：咁咪即係叫我睇住你"鋸排"，我唔食你都唔準食．．．
男：咁食台灣野好唔好？（有Ｄ火）
女：台灣野好多油，好肥架（撒嬌狀）
男：咁去食粥啦（已經開始 "發悔氣"）
女：天氣咁凍，食粥唔飽肚
男：麥記"定"家鄉雞．．．行啦（江良才盡"發悔氣"，明顯已經唔想諗）
女：都話熱氣落．．（委屈狀）
男：咁不如妳話事啦，我唔想諗啦．．．
女：我就係諗唔到食乜先叫你話事，你比Ｄ主見得唔得（發脾氣）
男：唔係話熱氣，就話肥，我真係諗唔到仲有乜可以食（爆發了）
女：咁係熱氣、係肥"呀嗎"．．我有講錯咩，自己諗唔到就亂發人脾氣（惡人先告狀)
男：咁去"味千"食拉麵好唔好（死狗狀）
女：唔．．都好，我要食咖哩拉麵∕炸餃子
仲要食雪糕（明顯係見好就收）
男 : ( 心諗) 你老味~神又你鬼又你~咖哩唔撚熱氣、炸餃唔撚熱氣、
仲食雪糕凍撚死你! 正一八婆!!

流金歲月

2006-07-10T01:07:00.000+08:00

首先, 容許我說一聲: 我頂....真係'小喇叭'
這篇文我寫了四次都post唔到, y not????
家o下希望得啦!!
上星期與中學同學有一聚會, 差不多十幾年冇見, 大家的容貌沒有太大轉變(在那刻及在我心中), 大家見到面時, 話題說到中一時, 我彷彿突然回到那時, 大家說着一些有共嗚的話題時, 大家都捧腹大笑, 說着看着都已十多年了, 大家背後都有着不同的故事, 有些為着目的而奮鬥,有些今作歸家娘. 那只是各取所需及各取所要啦!!

我的細仔

2006-07-07T11:04:00.000+08:00

我個細仔, 時常令我笑到'人仰馬翻''腸菤肚痛', 昨天與他 MSN 時他說嬴左學校的'最俱創意設計獎' 亞軍,
我讚他, 他說不知為何會得獎的經過比我聽, 事緣是他給作品噴油時, 一向大意o既佢唔小心將手指模印左上去, 學校規定每人只可用一隻色來噴, 但他想補回手指印, 於是攞左成十隻色油來噴, 而那些油因已是差不多用到尾, 噴出來時一舊舊同一撻撻, 佢亂咁噴完之後就交左, 就咁就攞左獎, 而學校又頒錯獎, 令佢好唔開心, 因為本來佢份獎係食物, 而家變左份係冠軍獎的'記事薄', 皆因佢為人只愛食野, 他試過為左一份老麥餐, 而同兩個同學鬥食壽司, 三人合共食左 83 碟, 而佢已一個人食左 48 碟大比數嬴左, 之後我鬧到佢痴肺, 人出錢你出命, 又常常食到好飽之後打電話比我聽:'媽咪, 我頭先食左40隻小籠包, 好肚痛', 講講o下突然去厠所, 疴完出來話而家個肚又有空位喇, 好野!!

西藏

2006-06-29T23:52:00.000+08:00

青藏鐵路將於星期六通車, 神秘的西藏從此不再神秘, 人類與大自然不停角力, 此終岩漿不及腦漿, 青藏鐵路由50年代開始動工, 但因技術問題, 70年代停工, 再於 2001 年從新開始動工(資料來自新聞透視),終於貫通了.
一直很嚮往此地方, 2002年一個人去尼泊爾trekking時, 去到一個'jumpson'的地方, 若由此行去西藏大約十日, 當時很有衝動改變行程, 由尼泊爾行去西藏, 但時間不許可, 放棄了, 直到現在有一丁點遺憾. 一直都留意着青藏通車情況, 現在如前在弘, 真的不想她給資本社會入侵, 我想像不久將來的西藏, 藍天卡通雲, 藏民的純樸, 純簡的生活, 布達拉宮, 亦由此鐵路通車後改變, 改變成與中國其他大城市一樣商業化, 但我仍然期望可以乘坐火車到西藏.

陽光師奶

2006-06-27T00:08:00.000+08:00

從小到大都喜歡太陽天, 太陽越猛我越愛, 夏天對我來講, 是很青春無敵的感覺, 雖然一把年紀, 但年青心態一直沒變, 陽光給我的是能量, 有了能量便會活力充沛.

每個猛烈陽光的夏日, 對我講都是過度活躍的活躍期, 但我每年都仍然期待着夏天有很多無限sunny day!!

高溫境界

2006-06-25T23:45:00.000+08:00

33度的高溫, 在野外不知會再高多少度, 極盡猛烈的陽光, 好像很不滿意已屈了個多月, 才把它一次用力發出來的能量.

今日是我第一次玩 Wargame , 去到後猛烈射我的.....陽光偷偷告訴了我:「你中計了!!」一落車, 好像已溶了一半, 加上看見'班長'層皮(迷彩), 而且是長袖衫和長褲, 再加多個面罩及帽, 真是還未穿上, 已暈了一大半, 但沒辦法.
一開始時突然落了一陣大雨, 地上的泥地已變成泥漿, 好核突, 還要爬在地上爬行, 真的要幻想自己在戰場中, 又因帶了帽和面罩的關係, 我的臉不停流汗, 全流向我的眼和口, 汗已把我的眼弄得很痛, 又要防範敵人, 又要狙擊敵人, 又要抹汗, 又曬, 又熱, 打完第一場之後, 我好像由泳池行上來似的, 由內至外, 上至下, 通通濕透(包括燈罩,雞籠),初初只想打一場便收工去攤抖, 但.....係唔可以放棄o既, 所以此終也打完全部(合共五場).

感覺:覺得這運動好唔環保, 眼見四周圍都是 BB 彈, 那些人死了之後(給人打中的), 因無聊等着遊戲結束, 所以珀百無了賴地用他們的搶來打四周的植物, 我看不過眼便給了一句:「你O地好殘忍, D 植物好可憐, 火燒同人類的破壞都不能反抗, 白白當殃, 因它們唔識走.」人類(包括自己)實在太自私了! 任何都是只為自己.

今個禮拜五、六、日

2006-06-21T22:43:00.000+08:00

星期五, 青梅竹馬終於結婚, 要去飲, 更係想佢地白頭到老啦!!! 但.......若果離婚!!人情會否退回????
星期六, 放學後(standard for 準時6:15pm)要裙拉褲甩趕去老尖 7:00 入席的攀山總會Annaul Dinner.
星期日, wargame!! 一生人第一次玩wargame, 從未試過, 我諗應該幾好玩, wargame....我諗起班長.

飛逝

2006-06-18T23:32:00.000+08:00

轉眼又半年了, 距離死o既日子又快多半年, 這 6 個月開心了不少, 差不多回復番十年前的悠然生活而自得其樂的世界裏, '一晚煲三隻 DVD' 哈哈!!
不過開始會很忙, 因為第三個課程快完結, 要做功課, 對上的沒交, 有自食其果的感覺, 所以這份不容有失, 另外要做一份更趕的....就是前陣子我於某會徽章設計比賽得到冠軍的作品, 因他們已計劃要用此來作很多製品, 包括給外隊來港比賽的紀念品,代表香港出賽的會旗及其他有關該會的東西, 所以有些壓力, 我是用 freehand 來贏了其他參賽者的電腦繪圖, 亦因當時該會是用了'中國香港 XX 總會', 而現在取消了中國兩字, 所以我要從新畫過, 雖然有點壓力, 但難唔到我.

還記起以前自己所設計的作品給人抄了, 那心情係又喜又憤, 真架!! 喜是人家認同你是好設計才抄, 憤是'係同一個 FAIR 見到', 轉眼又已過十多年了, 時間的飛逝, 任何都追不回,趕不上.

接下來的2006下半年會有什麼驚喜發生或是平淡中的平淡呢??

神與霍金

2006-06-12T00:08:00.000+08:00

知道他將會來港後, 很想聽他的演講, 但門票如何得到? 我是他的粉絲. 亦擁有一本令人看不明的手稿,'時間簡史'.
有時想: 他是否與神對抗的犠牲品?
他在 21歲時發表了地球是由宇宙大爆炸產生, 之後, 他於24歲便有了全身肌委縮症, 神是存在?? 若是有的話, 今天他的遭遇也許是對牠的懲罰?
若是堅, 那對於我來說, 牠是自私, '只許周官放火, 不許百姓點燈',人家拆掉西洋鏡之後, 便把其置於求生不得,求死不能的狀態, 神愛世人的誠諾何在?? 若說神是人慈的話, 為何霍金會得到如此下場, 一個人於黃金時代時(20 - 40)強迫接受xx的現實, 人慈??哈哈.....
我曾幾何時已決志, 但這些年來有很多問題我都找不到答案, 所以遲遲都未能受洗,可能我不是一個盲目而要清醒的物質, 有些事很想清晰後才決定, 但自從接觸了哲學後, 我想...有些事要一定弄清楚存在與不存在的存在心性, 宇宙的存在是事實, 但神的存在...
霍金與神, 實體與虛幻....

但我真的很想聽他的演講.

下雨天

2006-06-09T22:13:00.000+08:00

足足落左有一個月雨, 真係討厭, 自從成年後就不喜愛下雨天, 覺得落雨對人是很污穢, 但對大自然來講, 就係大清洗, 大雨過後煥然一新,每次逢落雨, 我必定放工後第一時間返屋企, 不喜歡周街爛, 所以這個下雨天看了'飛短留長'這齣劇, 對它一見鍾情, 本來已很喜歡赤柱這地方, 加上用輕鬆小品的手法拍攝, 看得我很舒服, 有些返回荳蔻年華的年代, 今晚是happy ending大結局, 劇完了後, 倒有點失落有點不捨得, 也可能加埋那霉霉濕濕的天氣關係啦!
屋外不停行雷閃電黃色瀑雨, 我把燈關掉, 坐在露台前看到一條又一條的閃電從空中直劈落海上, 紫色、藍色、白色等等, 縱橫交加, 構成一幅幅獨特的螢光影像, 顯示了大自然的誘人魅力.

黑色星期四

2006-06-08T22:50:00.000+08:00

爛瞓是我的嗜好, 今日嗜好玩大左.
今早七點半醒左, 突然嗜好又作祟'番瞓', 到第二輪醒時已經係九點, 當堂嚇醒, 即刻彈起身, 我係返九點半, 匆匆梳洗後眼耳口鼻同埋三魂七魄未點齊數就標出門, 九點三仲o向山上, 我用小鳥咇咇o既speed沖落山, 跳上的士'唔該紅磡', 真正體驗到時間就係金錢的現實, '多謝 150 個大烊'.
到下午, 同人剎氣爭坳, 死左好多細胞, 連飯都無食, 公司又突然有事要即刻入葵涌, 趕到我氣咳, 到夜晚買左隻 subwoofer, 二十幾磅重, 我捧住隻野, 一行出街,依!!唔對路...唔係掛'落雨'我頂...., 隻野越攞越重 , 又落雨仲閃埋電添, 我成隻落湯雞咁, 唉!!仲要捧住佢行上山, 點解要我攞住咁大隻野先來落雨?? 突然諗起細個老爹講'千里送鵝毛'的故事, 揸條鵝毛行一千里, 鵝毛越攞越重, 最後連鵝毛都掉埋.

今日都算係我o既黑妹日.

好想......

2006-06-05T23:37:00.000+08:00

好想唔返工...
好想放長假...
好想去旅行...
好想早退休...
好想好多錢...
好想...好想...好想...

好想食韓國燒烤...
好想打邊爐...
好想BBQ...
好想狂隊啤...
好想飲唔醉...
好想有對手...
好想...好想...好想...

好想唔去想...
好想無想像...
好想無幻想...
好想...你想唔想??
我好想.......

幸福新一代

2006-06-03T23:13:00.000+08:00

大前日收到大老細同我講話暑假去加拿大,
我好唔開心, 連機票都出埋, 我先知,
因為覺得只係知會, 而唔係咨詢,
仲係只得佢兩兄弟去, 無其他人陪,
對孖寶 d 英文屎到痺, 都唔知佢地點同西人溝通,
等佢地平時'唐人面前講鬼話, 鬼佬面前就口啞啞',
另外一面睇, 比佢地體驗o下人生路不熟的經歷,
都未嘗唔係一件好事.

回想起自己細個果陣, 一到暑假就去周圍撲暑期工,
成個暑假賺果一千蚊就係用來買書,
但睇到而家新一代, 個個衣食豐足,
'衣來張手, 飯來張口',
一到暑假就參加埋 d 嘜班物班,
富泰o既就醒佢地去果 d 名為'暑期海外進收班'
實質咪吃、喝、玩、樂, 搵笨 seven 班,
班望子成龍o既家長, 一隻隻好似羊牯咁,
無他o既, 咪自己細個果陣得唔到o既,
到家o下自己有能力,
就將之投射, 以為去迫 d 細滿足後,
來滿足番自己以前細個滿足唔到o既野,
現今世界唔同左喇, 老豆養仔, 仔養仔.

我點都覺得暑假只係玩,玩,玩....
唔應該放暑假都要去學野o既.

我玩病, 病玩我

2006-05-26T23:33:00.000+08:00

星期二晚發起高燒來.....102度,
身體任何一忽掂o下都好似比刀割咁痛,
由外至內, 由頭到腳, 無一倖免,
意志好模糊, 耳仔聽野好細聲,
周身無力, 個頭痛到爆,
當時好驚,我以為會'死',
突然諗起, 如果有個救命鐘就好囉!
我沖左盒仔茶, 拍左兩粒必理痛,
然後用兩張棉被冚住, 焗到佢出一身汗就掂,
細個果陣時一發燒, 老媽就係用喱個方法,
不出15分鐘, 我已經好似水人一樣'濕透',
係好似鬆左 d 喎! 再探....口(我係大人尼架)
已跌至99.8, 再瞓多一陣, 其實都係典來典去,
又來!!一探之下.....101...101,
點解會咁架??明明係退左格...,
再拍多兩粒必理痛, 今次我攞埋個電話放o向隔離,
pass 定 999, 一有咩三長褲短就即刻send(好似引爆咁),
起碼有人破門呀嗎!!

足足病左 3 日, 家o下喉嚨痛到唔想吞口水,
都唔明點解一定要係喉嚨痛果陣時, 無端端多左咁多口水要吞,
又唔可以挈大個口等佢流.....

馬拉餘孽

2006-05-20T23:45:00.000+08:00

唉.....!
跑了兩年半馬, 每次都有芛野醒比我.....肥五磅, 合共十磅, 真係多謝喇!!
天呀!!!點解?? 點解要我跑完之後咁肚餓??點解灣仔咁多野食??
點解我忍唔住口??點解我要帶咁多朱古力???
每日一朝上磅時, 仍然睇到有升無跌o既數目字,
真係好難接受, 其實可能係個磅壞o既...
出年唔會再參加, 有 D 野...經歷過便算了,
老時同個孫講: 你ah ma 我呀!!咳咳...跑過架...!!

至於 NIKE 十公里, 我唔會放棄O既.

完美的一天

2006-05-17T23:16:00.000+08:00

近來很愛聽孫燕姿的'完美的一天',
裡面的內容簡直是我的夢想.

"我要一所大房子,
有很大的落地窗戶,
陽光灑在地板上,
也溫暖我的被子.

我要一所大房子,
有很多很多的房間,
一個房間有很快的網路,
一個房間有很多的吉他,
一個房間有我漂亮的衣服,
一個房間住著朋友和他的愛人,
一個房間一個房間,
我也不知道該放些什麼.

告別黯淡生活.

我們晚上不睡覺,
白天在床上思考,
小狗在屋裡奔跑,
度過完美的一天,
度過完美的一天.

我要一所大房子,
有很大的落地窗戶,
陽光灑在地板上,
也溫暖我的被子."

最近個腦每日都響起此歌同浮現此情此景來,
真係好完美,
唔知幾時先至可以實現夢想....

舞親節

2006-05-14T23:09:00.000+08:00

今日是一年一度的母親節亦即是舞親節,
這天母親是無任何發言權, 全都是仔仔女女孫孫室室的天下,
Basic 行程如下:
早上 8:30 飲早茶
下午 1:00 打麻雀 (要扮魚腩, only this day)
晚上 7:00 食套餐(即單身漢平時只比30雞就可得到四餸一湯白飯任裝的寡佬套餐)我地就要比成千銀去食呢 d 一早煮定, 要嘜畢嘜, 同寡佬餐一樣, 真係想講粗口, 下刪250字粗口, 所以今晚我親自下廚, 老媽食得很開心, 雖然我也是老媽, 但看見她的快慰, 我很安慰.

大家的老母就此糟塌了於好一個舞親節,
全都是係你舞你老母,(included me)
因我舞我老母之時也給人's舞.

此人's

他們送了此花給我, 我很開心, 仔真的大了!!

至於我兩個老細, 我沒要求他們如何報答自己, 因明白希望越大, 失望越大, 所以隨遇而安好了.

夢中人

2006-05-12T10:51:00.000+08:00

又是星期五了, 每當假期前更發一次的'假期前本per潛伏症' 又再開始出現病徵.
今日好似未瞓醒咁o既姿態去返工, 皆因昨晚發了一個令我唔想醒的夢,
夢中去到一個人間仙景的地方,
很藍的大海, 很藍的天, 水天一色, 水清沙幼,
真係好靚, 好真實,
我與夢中情人一起處於其中, 好開心,
夢中出現一間茶寮, 西雙版納的建築裝飾,
這正是我所喜歡的夢幻之家,
我在那裡看着那個一望無際的卡通天,
以及那玻璃海水之中發呆時,
突然天色轉眼變黑, 水脹起來,
狂風巨浪湧至, 將童話式的景象, 一舜間變了,
更傳來火警鐘的聲響, 原來是鬧鐘,
喂!!大佬, 個夢未發完架, 我仲未落水游,
又未晒太陽, 都未睇筋肉靚仔......,
我唔想面對現實住呀!!!
希望今晚可以發埋下集啦!
我臨瞓前會搽定太陽油同着住三點色兼帶埋太陽超,
做足準備先去瞓, 呵!呵!

網中人

2006-05-10T22:37:00.000+08:00

今天在網上尋找一些資料時,
嚇然發現了一張我惜日的影踪,
曾幾何時給他人偷拍下來, 而我是完全不知道,
還好, 看那時的造型, 應該是三,四年前,
在牆上剛剛博完命下來.

很喜歡這張自然得很的舊照,
應該是遊島人的傑作.

知識鏟權

2006-05-08T22:28:00.000+08:00

昨日遊沙田時, 大老細同我講, 話而家電視買晒廣告o既 'O 嬋' 同 'O 桃' 減肥腰帶, 係抄一款幪面超人變身腰帶的, 大半年前在沙田某間玩具店有得買, O下!! 唔係啩!! 佢即刻帶我去睇O下仲有冇, 原來重未賣, 比人劈埋一二角, 個盒仲殘過敗柳, 還揾到多一條 2 號, 我即時買左兩條, 幪面超人 1 號同 2 號來變身, 叫店員試試是否可行, 一試帶上腰....與孖 O 的震盪一模一樣, 再睇出產年份, 係2003年, 回家真正帶上身震左 20 分鐘後, 我居然想去厠....

人家的變身腰帶, 變左而家的瘦身腰帶.
佢地有無問過幪面超人1 號'本鄉蜢'同 2 號'一文字準人' 先??

孖 O 咪即係偷左超人 D 野???
知識產權??
用抄襲知識, 鏟除原創權利.

陪老細

2006-05-07T21:46:00.001+08:00

今日老細日, 我陪大老頂同細老頂一齊遊沙田, 之前我怒了大老頂, 因他放了我飛機, 我不可以養成此壞習慣, 所以不啋他已半個月, 就算他send SMS 也不理, 但直至昨晚, 打電話給細老頂不通, 迫不得意要打比牛精大, 他一接電話, 我就問係唔係牛精? 佢答唔係, 係雞精, 之後我問佢O向邊度, 佢居然好COOL咁答: O向地球!!
我...我..即時笑到眼淚水都 bill 埋出來, 衰仔洗唔洗咁吋???

今日同佢地行完街之後去打拎, 我隊啤, 佢地隊可樂, 大家傾左好多野, 明白大家角式的位置, 我不是一個好老媽, 廿多歲便狠心棄子拋夫, 因子女與父母關係其實平等, 大家都是人, 關係是由 CUT 臍帶果一刻便告終, 佢地就要開始承擔獨立個體的縮命, 生、老、病、死的歷程, 佢地都好明亦好開心有一個非常媽咪, 我是一個在他們心中的明白事理媽咪, 背負傳統, 有另一番歪理的媽咪.

還記得細老頂曾經對佢亞婆(即我娘親))問了一個問題:' 婆婆, 你幾時死呀??' 婆婆開懷大笑說:點解你咁問?? 我細老頂答:人一出世就係等死架啦!!!
無錯, 人一出世就係步向死亡, 好一個四歲小孩的哲學問題.

預左賽果

2006-05-06T01:10:00.000+08:00

子夜刻意地在看電視包山比賽(雖然入唔倒圍)hehe....,
但對着電視也情不自禁地大叫'志偉' 加油, 賽果早料到是第二,
因自己友對他做了心理輔導, 前幾天, 雀戰時跟他說:'人家說你是第二就第二喇! 知道嗎??'
他的成績, 我們有目共睹,
第二?? 只是他留力及明白傳統的意義.

火舞黃沙

2006-05-01T23:48:00.000+08:00

今晚返到屋企, 開電視時以為電視壞左, 成個畫面都黃咁咁, 睇清楚先知係無線新劇'火舞黃沙', 妖~~!! 叫黃沙都唔洗個畫面都黃晒呀嘛!! 妖~~~~

個人第一感覺是: 又是一 '例' 劇, 除了個黃沙景同個無端端變黃o既顯像管之外, 其他劇情呀, 感情呀, 親情呀等等, 都是跟以往的無線長劇差不多一樣, 其實都幾悶, 感情線亂過'畢加思索'的後期創作品, 全都是蜘蛛網式情線, 有點大被同眠的感覺, 再加上兩族對疊的所謂先爭鬥後和好或合作來抗敵反完又反又反的煽情暴力做劇引來作餌, 肯定令香港好多師奶一至五晚9:30 - 10:30 會不惜拋夫棄子去'背夫偷看', 而且都好索氣.

香港人真係好悶啊!!

出年再來

2006-04-30T00:02:00.000+08:00

今日比賽真係......唉!!
抽籤抽到早爬, 真係心理同身理都未準備好就要上,
加上'陽朔燻蹄'仍在腫痛,
而且一后三皇o既陣容, 我睇到都嚇窒,
當時又落雨, 其實應該停賽待雨停之後, 先開始, 因竹面有水真係好滑,
我一起步, 因有水, 竹很滑, 借唔到力, 足足要用左 8 秒先起到步,
好肉酸, 上星期試玩時, 一起就得, 十多秒就搞掂,
唉!.....點解???.....唉!....點解要落雨....唉!.....點解我要痾屎唔出賴地硬...???唉!!!

唔得! 條氣唔順, 出年一定 'I will back'!!

山路